20 dic. 2012

FIN DO PRIMEIRO TEMPO: BO NADAL

POIS AQUÍ REMATA A PRIMEIRA ANDAINA DO BLOG DA BIBLIOTECA.
EMPEZOU O 19 DE OUTUBRO DESTE ANO E EN DOUS MESES ALÓ VAN MÁIS DE 30 ENTRADAS, 3000 VISITAS, COMENTARIOS, CLUBES DE LECTURA...

EN XANEIRO.... MÁIS!
  
O EQUIPO DA BIBLIOTECA DESÉXAVOS
A TODAS E A TODOS:

E esta é a mensaxe que nos deixou Celso Emilio ao pé da nosa árbore de libros:
Que a esperanza e a verdade vos acompañen!


O GRAN DÍA DO HOBBIT

AMIZADE CON GANDALF

Si, creo que iso define ben o que sentimos ao rematar a película nun céntrico cine da cidade de Lugo, a onde nos desprazamos 43! membros dos clubes de lectura de Secundaria, Piratas, Leóns, Ítaca, para ver a película da obra que viñamos de ler, nalgún caso, ou que leremos no futuro -os pequenos Piratas-. AMIZADE CON GANDALF e con Bilbo, con Thorin, fillo de Thrain, ou con Elrond, señor dos Elfos.

Para non falar de Galadriel.

Disfrutamos moito, moito. A verdade é que o pasamos moi ben, aínda que se cadra non era a película que nós tiñamos na cabeza, que cadaquén faise a súa mentres le.



E como diría un clásico: CINE, CINE, CINE, CINE...MÁS CINE POR FAVOR! QUE TODO EN LA VIDA ES SUEÑO... Y LOS SUEÑOS... CINE SON!

Aí quedan algunhas imaxes máis desta mañá tan "fantástica":

Ás veces un recibe unha visita inesperada:


E claro, hai que convidar a comer algo:


E a sala énchese de xente:


E un séntese anonadado:
                            non podes deixar de mirar!


E comeza a viaxe: que sexa longa!


19 dic. 2012

DOAZÓN

A galego-cubana María Karla, de 2º da ESO, quixo achegarnos a súa terra de orixe e ocorréuselle que estaría ben o dispormos de algunha obra do grande José Martí á Biblioteca. Agradecémoslle a doazón que nos fai e celebramos tamén a súa re-incorporación aos Leóns de Bagdad, despois dunha paréntese de dous trimestres.
Con xestos coma o de Karla medramos todos!

14 dic. 2012

REMATOU O MISTERIO NA BIBLIOTECA!

Xa temos vencedor!
JAVIER SUÁREZ PENA desvela o misterio antes ca ninguén!


Efectivamente, os estraños sinais aparecidos na nosa Biblio eran o símbolo das "reliquias da morte", obxectos que aparecen no último libro da serie de Harry Potter. Ademais, Javi soubo buscar a sinatura deste exemplar na nosa Biblioteca: GPS HAR 7.

O seu premio?
Unha entrada gratuíta para ver "El Hobbit" o xoves que vén no cine.
E un bonito "Vale".
E, se cadra, algunha galleta...

Na imaxe, o Bibliotecario Maior do reino CODIMA faille entrega do VALE a Javier. O gran Dánel foi o segundo máis rápido en resolver o misterio, pero aquí o vemos con total deportividade exercendo o seu rol.

12 dic. 2012

OS MÁIS PEQUES DO COLE NA BIBLIOTECA!!!!!

VISÍTANNOS OS NENOS E NENAS DE 3 ANOS
O futuro xa está aquí


Xuntos, contamos este divertido conto
(e eles pódenllo contar aos seus papás, se lles preguntan...)


Logo divertímonos botándolle un ollo aos libros da Biblioteca:


Había moitísimos!

 

Foi moi divertido!!


E tan contentos estivemos que rematamos cantando: porque para aprender a ler, primeiro hai que aprender cancións! E poemas, e contos, e ditos, e adiviñas...
e despois é moito máis fácil aprender a ler!!!

11 dic. 2012

RAPAZAS

Paula Elí, de 4º da ESO, leu e recomenda "Rapazas", de Agustín Fernández Paz.




Isto é o que nos escribiu: "Este último libro que lin en galego reultoume bastante interesante, xa que en moitos casos conseguín sentirme identificado con algunha das personaxes. Reflicte o mundo novo que os mozos adolescentes estamos a descubrir. Trata, en moitos casos, dos sentimentos, do colexio, da familia, do noso entorno en xeral... É un dos mellores libros que teño lido en galego ata o momento e
recoméndoo sen dúbida algunha."

 

Fiádevos, pois, das palabras de Paula e lede esta obra de Agustín Fernández Paz,  todo un mestre e gran contador de historias, sen dúbida. O máis lido no noso centro. Por algo será.

7 dic. 2012

OS DE ÍTACA ATOPAN A SMAUG

En efecto, podemos dicir solemnemente que, en plena tempada de exames, os maiores veñen de acabar O Hobbit. Aquí os vemos, ou non os vemos, en plena faena:


Cara de sorpresa das lectoras ante o inesperado final:

- Mi madriña!!

4 dic. 2012

RUTAS LITERARIAS NO MUSEO PROVINCIAL

"PIRATAS POLO MIÑO" ASALTAN O MUSEO PROVINCIAL

Efectivamente. os máis peques dos Clubes de Lectura, os "Piratas polo Miño", de 1º da ESO, leron o libro Contos no museo e hoxe desprazáronse ata o museo para participar na actividade denominada "RUTAS LITERARIAS POLO MUSEO". Alí, divididos en grupos de catro, percorreron catro rutas diferentes (a ruta do trasno, a da serpe, a da pantasma e a do paxaro) contestanto as preguntas que lles propuxeron e que tiveron que ver tanto co libro lido como coas coleccións expostas. Ao final houbo catro gañadores -Ángela, Manuel - que recibiron un bolígrafo de agasallo e todos levamos un marcapáxinas de agasallo.

Non é a primeira vez que desde o colexio se propón esta actividade, pero esta vez saíu moi ben, así que en febreiro volveremos, esta vez cos "Leóns de Bagdad" de 2º da ESO.
E aquí están algúns piratas diante da Escola de Doloriñas, que todos coñecemos.

Xa na saída, no refectorio vimos unha exposición
de monicreques de todo o mundo:


E orgullosos que marcharon ao descubriren tanta riqueza
 e patrimonio cultural que atesouramos na nosa cidade!

30 nov. 2012

MISTERIO NA BIBLIOTECA!

APARECEN ESTRAÑÍSIMOS SINAIS NA BIBLIOTECA DO
COLEXIO DIVINO MAESTRO DE LUGO !!!
Nestas dúas "instantáneas" vemos a Diego Basadre, de 4º da ESO sinalando a "marca" que apareceu tanto na porta coma nunha parede da Biblioteca (non deixedes de observar as lecturas de don Diego).

Ben, o "asombroso" do caso é que estas marcas levan aí MEDIO ANO!! Foi o pasado xoves, 29 de novembro de 2012 cando alguén preguntou por elas por vez primeira! Foron Elora Pérez e Rocío Valín, de 2º da ESO as que quixeron saber de que se trataba. A súa curiosidade terá recompensa!!

Agora vén o reto. ATENCIÓN!!!
Concederaselle gran recompensa á alumna ou alumno que envíe o primeiro comentario indicando que é ese misterioso sinal, en que libro aparece e cal é a súa sinatura na nosa Biblioteca (p. ex., EPR STI 8). Ánimo aos valentes... non é tan difícil, despois de todo o profe Costa soubo de qué se trataba nada máis ver a marca...
Tede en conta tamén que pode haber variantes do mesmo sinal.
Coidamos que esta se axusta á descrición do libro...
Aínda que na peli era un pouco diferente...
Non hai máis pistas!
SHHHH!!!!

29 nov. 2012

E morrerá a lingua dos galegos? EU FALAREI

 Falando hoxe un grupo de profes lembramos este alucinante lipdub que o EDLG do IES de Chapela (Vigo) elaborou o curso pasado, coa participación de máis de 400 persoas. Recentemente premiado no OUFF de Ourense, este vídeo, baseado no I WILL SURVIVE de Gloria Gaynor, foi moi divulgado pola rede o curso pasado.
Botádelle un ollo; paga a pena.

 eu falarei!

26 nov. 2012

QUENTANDO MOTORES PARA O HOBBIT

Os de Ítaca andan a rematar O HOBBIT e parece que xa vai creando expectación a chegada da película de Peter Jackson. Aquí vemos a algunhas mozas da estirpe de Kavafis (ou sexa, de Ítaca) que foron sorprendidas polos paparazzis a fin de semana pasada nunha sala cinematográfica da cidade das murallas cando se fotografaban co gran Gandalf, que xa anda por cerca. O conto é, atopará Bilbo o tesouro?
E os de Ítaca, que atoparán?




23 nov. 2012

CIDADE DA CULTURA

O xoves, 22 de novembro, os de 2º e 3º da ESO andaron de excursión por Compostela. Entre eles, como non, boa parte dos Leóns de Bagdad e dos de Ítaca. Da capital de Galicia visitaron o Parlamento, as cubertas da Catedral, o pazo de Xelmírez e, para rematar, foron até o monte Gaiás para ver na Cidade da Cultura a exposición Gallaecia Petrea -recoméndase vivamente- e máis a exposición de códices -si, entre eles o Códice Calixtino-, que por certo resultou interesantísima, en boa medida porque o guía era magnífico. Ben, o caso é que  á saída non houbo tempo de ir á ciclópea Biblioteca, pero os dos clubes si que se fotografaron  diante desta instalación libresca. Non estivo mal coma colofón a unha xornada intensísima na nosa "cidade eterna".

21 nov. 2012

SEGUEN CHEGANDO NOVIDADES

E seguen chegando novidades á nosa Biblioteca.

 Falámosvos primeiro do penúltimo de don Agustín Fernández Paz. Trátase de Fantasmas de Luz, libro breve onde o noso vilalbés favorito novela o drama do desemprego nestes violentos anos dez que nos toca vivir. É, ademais, unha poderosa homenaxe á setima arte: o desempregado é un traballador do cinema que perde o seu posto. Esta circunstancia motiva que o conxunto da obra estea trufado de referencias fílmicas, frases memorables de películas e diálogos antolóxicos que non deixan a ninguén indiferente.




Traemos tamén aquí este O noso amor será eterno, saído da pluma de Rivadulla Corcón. Non se trata dunha obra recén saída do prelo, senón que xa leva algún tempo nas librarías. É por isto que algúns alumnos de noso xa a coñecen e, xa que logo, María Castro Real, de 4º da ESO,  dinos que "este libro é dos meus preferidos. a incansable loita do protagonista por conseguir o seu propósito de reunirse eternamente ca súa moza fai que vivas en propia pel a fermosa pero tráxica historia de amor eterno entre un trobador e a súa amada."
Fica claro que parece tratarse dunha historia chea de romanticismo. Nós non podemos deixar de destacar o que nos parece unha magnífica ilustración da portada.

19 nov. 2012

HOBBIT-AGASALLO

Como sabedes, a semana pasada retamos aos nosos lectores  con tres adiviñas tiradas de O hobbit. Ben, pois transcorrida unha semana xa temos vencedor absoluto: o máis rápido do Oeste foi Vítor Suárez, de 1º da ESO, malia que algún de 2º andou moi cerca. Noraboa a todos. Aquí deixamos unha foto para ilustrar a entrega do agasallo: un exemplar do penúltimo premio Merlín, A chave da Atlántida, de Anxo Fariña, que nos visitara o curso anterior e nos deixara algúns debuxos que aínda locen na nosa Biblioteca.

Na primeira foto, o Bibliotecario Maior faille entrega a Vítor do seu agasallo. Na seguinte, o premiado loce a súa nova novela.

15 nov. 2012

Hai xa un tempo o alumnado do IES Chano Piñeiro, de Forcarei, gravou este vídeo de animación á lectura. Identificámonos plenamente coa descrición que fan na súa canle de youtube, que nos valería ben de bandeira:

Fomentamos a lectura porque cremos nela como un Valor. Ese Valor ausente na nosa sociedade de consumo, sen reparos en ser deshonestos, cunha soa relixión: o diñeiro.
Cremos na lectura como solución.
Cremos na lectura como viaxe, como multiplicación, como evasión, como interese, como sabedoría.
Cremos na lectura como universo. Como o don da racionalidade, da fantasía, da grandeza, do horizonte sen fin.
Cremos na lectura como CULTURA.
E sobre todo cremos na lectura no noso idioma, na nosa lingua.


Ah, por certo, a canción orixinal é do gran Manu Chao, mudándolle a letra, xaora.
Ala! DARLLE AO PLAY!

14 nov. 2012

EN GALEGO

En galego, fermoso videopoema baseado nun texto de Miguel Ángel Diz. Vía http://www.coordinadoraendl.org/

En Galego - Miguel Ángel Alonso Diz from lavioneta on Vimeo.

CERTAME LITERARIO


XVIII CERTAME DE CONTOS E RELATOS CURTOS
TRAPERO PARDO


Co obxecto de contribuír a fomentar a creatividade literaria entre os
escolares e estudantes lucenses, o Concello de Lugo, convoca o
“XVIII CERTAME DE CONTOS E
RELATOS CURTOS TRAPERO PARDO”

Para ver as BASES, preme AQUÍ.
 

13 nov. 2012

HOBBITADIVIÑAS

As mozas e mozos de Ítaca, como xa saberedes os máis avisados, andamos pola Terra Media, a voltas con ananos e con aneis, seguindo os pasos de Bilbo Baggins -Bilbo Bulseiro na magnífica tradución galega-. Pois nalgún dos últimos capítulos que lemos o pequeno e xa entrañable hobbit desafía a Gollum nun reto de adiviñas para ver quen se queda co anel que tanto os atrae a ambos. parecéronnos realmente inxeniosas e por iso vos traemos algunhas aquí, a xeito de desafío:
 
Caixa sen chave, tapa nin bisagra,
pero dentro un tesouro dourado garda
 
Aí vai outra:
 
Sen pernas pousa nunha perna,
dúas pernas senta preto de tres pernas,
catro pernas queda con algo
 
E outra máis de balde:
 
Devora todas as cousas:
paxaros, bestas, árbores, flores;
rilla o ferro, traba no aceiro;
converte a dura pedra en fariña,
mata o rei, arruína a cidade
e bota a alta montaña abaixo.
 
 
Ben, pois agardamos os vosos comentarios coas respostas. Prometemos premio para o primeiro que dea coas respostas e sexa capaz de retar á criatura Gollum ou ao mesmísimo Bilbo. Claro que sempre podedes esperar a ver a peli, claro.Os de Ítaca non pode participar, ehhh?! E sen trampas!!!
 

10 nov. 2012

O EQUIPO SEGUE MEDRANDO

En efecto, o Equipo da Biblioteca continúa aumentando o número de colaboradores. Desde esta semana Iria López, de 3º da ESO, aquí flanqueada por dúas camaradas, incorpórase á nomina de bibliotecarios e colaborará connosco na colocación de libros, elaboración de catálogos e demais. De seguirmos a este ritmo imos ter máis bibliotecarios ca lectores! Alegrámonos moito de contar con Iria no Equipo da Biblioteca este curso, ao igual que en Ítaca

8 nov. 2012

NOVO COLABORADOR

Desde esta semana temos máis axuda na xestión de usuarios. Trátase de Yoel Meilán, alumno de 2º da ESO, gran lector e asiduo visitante da nosa Biblioteca. Así pois, todos os mércores, no horario de recreo, poderedes atopalo colocando libros, axudándolle a Dánel e Laura, facendo suxestións... e se cadra mañá teremos máis novidades!

7 nov. 2012

Flanagan ataca de novo

Nerea Domínguez, de 3º da ESO únese ao "Club de Flanagan" e cóntanos o seguinte a respecto de
Flanagan Blues Band:

"A min gustoume este libro porque mestura moi habilmente amor, celos, misterios, música e, sobre todo, humor. A historia consegue engancharte dende o primeiro renglón e sorprenderte cos numerosos xiros que dá a trama:

Flanagan coñece a Oriol Lahoz, un detective privado de verdade co que amiga moi axiña, pero na Semana Santa o parroco é asasinado, e o sospeitoso é Oriol. Coa axuda de Blanca, Charche e a súa moza, Flanagan empeza a investigar este caso que se remonta 20 anos atrás coa destrución da Téxtil e as continuas loitas dos Garreta e os Sellarés. Durante a busca do verdadeiro asasino atópanse con Martina Garreta,  típica muller fatal segundo Flanagan, que o mete en varios líos, dos que consegue saír ileso. Para conseguir resolver o crime, Flanagan e os seus amigos..."

6 nov. 2012

CONTAXIAR OPTIMISMO PARA A LINGUA

Con frecuencia empregamos este vídeo nas aulas. Para facer pensar. Para mudar o futuro. Para rachar con prexuízos e falsas crenzas. Para que outro mundo sexa posible. Para sumar. Para abrazar. Para incluír. Para soñar.


Podes ver isto, tamén. Ou isto.

2 nov. 2012

MAGOSTO: castañas a eito

Como o prometido é débeda, aí vos deixamos algunhas fotos do Magosto, das carteleiras tan chulas que fixeron os de Infantil e Primaria,... ummm! case arrecenden as castañas pola pantalla do ordenador!

31 oct. 2012

CABAZAS

Hoxe, 31 do mes de outono, foi un intenso día no noso colexio. Coa celebración do magosto e do concurso de tallado e decoración de cabazas damos por rematado este tempo e iniciamos o mes de Santos e as visitas aos nosos defuntos.

Pola nosa banda, cómpre darvos as grazas: aos que nos achegastes castañas, aos que as asaron, aos que decorastes cabazas, aos que trouxestes froitos, aos que decoraron o vestíbulo do colexio, aos que varreron ao remate, a todos os que colaboraron connosco para darlle hoxe outro aire -e algo de fume- ao colexio.... OBRIGADOS!

O Equipo de Dinamización da Lingua Galega.

Aquí vos deixamos algunhas imaxes das cabazas. Si, son unha marabilla  de creatividade, de imaxinación e de traballo. PARABÉNS!!!
Para ver todas as fotos, preme na imaxe.

As fotos do magosto? Colgámolas de camiño.



CABAZAS

28 oct. 2012

E TI, QUE LIBRO RECOMENDAS?

Samuel García Piñeiro, de 2º da ESO, envíanos a seguinte recomendación.
Trátase de Flanagan 007.

Juan Anguera, alcumado Johnny Flanagan polo seu enxeño á hora de resolver misterios, atópase cun que non lle vai ser doado de resolver. A súa irmá e o mozo desta, Carles Sistax, desaparecen misteriosamente un día. Parece que ámbolos dous traizoaron a unha ONG, roubándolle unha enorme cantidade de diñeiro destinado a un brote de cólera dun país do Terceiro Mundo. Flanagan non o pode crer, pero é evidente que dentro da ONG hai unha ''toupa'': Maica Valo, Xerardo Rei, Roque Alano ou Trevor Bishop, o encargado de levar os cartos aos señores da guerra en Madrid e ao que llos roubaron. Flanagan decide ir en tren ao Palace de Madrid, pero no andén sorpréndese polo bico que lle dá unha moza chamada Bruna, que fuxiu da casa, e que lle vai axudar a partir dese momento. No tren terá algunhas complicacións, pero chegará dunha peza ao seu destino. A partir de aí, empezará unha carreira conta reloxo na procura da súa irmá e dos cartos robados. O seu novo amigo Toribio axúdao cos señores da guerra no hotel e cos representantes da ONG. Descubre os segredos que tería que solucionar. Grazas aos enxeñosos enigmas de Carles e a axuda do comisario Campuzano logrará descubrir a localización da súa irmá, do diñeiro e quen é a toupa. Juan Juanes, un médico moi nervioso, e Nicanor Toledo, un abogado entrometido, faranlle a súa aventura máis difícl do que pode crer.

A min gustoume moito este libro porque introdúcete na lectura de forma instantánea e fai que a vivas. Os misterios e a forma de resolvelos son verdadeiramente impresionantes, e a mestura inesperada dos xéneros misterio-amor dánlle un toque de ''sabor''.

OBRADOIRO DE MARCAPÁXINAS DE 4º DE PRIMARIA

O pasado venres o alumnado de 4º de Primaria visitou a Biblioteca do cole para desenvolver un obradoiro de marcapáxinas coa súa titora. Estes mociños son visitantes asiduos os xoves, que é o seu día de préstamo a domicilio, pero desta volta o que os trouxo por aquí foi a elaboración de marcapáxinas: quen o diría, a plástica ao servizo da animación á lectura! Fai clic na imaxe para velas todas.

OBRADOIRO DE MARCAPÁXINAS 4º PRIMARIA

25 oct. 2012

CASTAÑAS E CABAZAS

Por Santos, neve nos altos; polo San Martiño, lobos no camiño e polo San Andrés, neve aos pés!

ESTAMOS NO OUTONO! Comeza a arrefriar e a chover, minguan os días e medran as noites... e xa que logo, é tempo de castañas, de cabazas e de todos os froitos cos que a natureza nos agasalla neste tempo. Xa está aquí o MAGOSTO. Xa chegou o momento de tallar as cabazas!

 Para celebralo, xusto antes do Día de Defuntos e de Todos os Santos, aínda que tamén podería ser máis tarde, invitámosvos a participar no xa tradicional

CONCURSO DE TALLADO DE CABAZAS

Haberá tres categorías (Infantil e 1º ciclo de Primaria, 2º e 3º ciclo de Primaria e Secundaria), aínda que tamén haberá premios para a cabaza máis simpática e para a máis terrorífica! Cada cabaza deberá levar escrito na súa base o nome e ocurso do autor. Data de entrega: 31 de outubro, nin antes nin despois.


Por outra banda, ese mesmo día tamén celebraremos o MAGOSTO. Para iso, cada alumno deberá traer un puñado de castañas anozcadas (cun corte para que non estouren.

Faremos tamén a xa tradicional EXPOSICIÓN DE FROITOS DE OUTONO. Coma sempre, serán benvidos exemplares de todo canto a nai Natureza nos quere dar: marmelos, mazás, uvas, millo...
As castañas e os froitos levaranse ao cole o luns 29. Lembrade, as cabazas talladas agardan ao mércores 31.  VEÑA A PARTICIPAR!!!!

24 oct. 2012

LIBROS NOVOS NO CATÁLOGO

A medida que avanza o curso van chegando novidades á nosa Biblioteca. Hoxe queremos destacar dúas obras que vimos de catalogar e que poden ser do interese de moitos mozos e mozas de Secundaria. A primeira delas é Palabras de Auga, de Marcos Calveiro. Foi a súa obra O carteiro de Bagdad a que lle deu nome ao Clube de Lectura de 2º da ESO.

En palabras do xenial autor,"esta novela trata dunha tribo nun lugar indeterminado de África que está no medio da sabana, no medio das secas, esfameada, fuxindo das guerrillas, da violencia e da fame. Palabras de auga alude a iso, a que non teñen auga. Alude a unha situación desesperada na que teñen que buscar o alimento mentres agardan a que o chamán reciba a inspiración dos deuses e decida sobre o seu futuro. A historia narra, en capítulos alternos e a través de flashbacks, como chegaron ata ese momento, todo visto polos ollos dun neno de once anos que se chama Amadou."
       Semella ben apetecible e recomendable.


Por outra banda chégannos estes Relatos de terror, de H.P. Lovecraft, un dos fundadores e mestres do xénero.
Relatos de terror reúne oito contos de Lovecraft (“A tumba”, “Do máis alá”, “Herbert West, reanimador”, “O can”, “A ceremonia”, “El”, “A besta da cova” e “O alquimista”) que amosan como este xenial autor foi o inventor dun novo xénero, o conto materialista de terror, no que utiliza os símbolos que se manteñen no inconsciente das persoas para espertar eses terrores ancestrais que xacen dentro do noso cerebro. Trátase desa literatura de terror «cósmico» que se dirixe á parte máis fonda do cerebro, dominada polos instintos e emocións que están na orixe do xénero humano.

Desde xa, ao voso dispor na Biblioteca.


23 oct. 2012

À LA BIBLIOTHÈQUE

Bienvenus à la bibliothèque!





Os alumnos de Francés de 4º da ESO traballaron hoxe na biblioteca nun proxecto colectivo que consistiu en describir aos seus compañeiros en lingua francesa.
TODO UN RETO!... pero os meus rapaciños son quen de calquera cousa!

A profe.