18 oct. 2020

18 DE OUTUBRO: ESTAMOS DE VOLTA. NOVA NORMALIDADE

                                                 NOVA NORMALIDADE

 

Despois de tantos meses, volvemos abrir a biblioteca!! Coma sempre, retomamos este blog o 18 de outubro, día de San Lucas, patrón do Mondoñedo de Álvaro Cunqueiro; vento nas velas!!

Como xa sabedes, o curso pasado, e grazas aos fondos achegados polo PLAMBE, comezamos a remodelar a Biblioteca: novo chan, paredes recén pintadas, mobiliario a estrear… Aínda queda moito por facer, pero mentres tanto imos funcionando; iso si, adaptándonos ás medidas marcadas polo protocolo Covid que ledes a continuación:


PROTOCOLO DE USO DA BIBLIOTECA





  • Ventilación: as portas permanecerán sempre abertas; e as ventás, o maior tempo posible

 

  • Aforo: 50%, é dicir, 12 persoas. Só poderá coincidir un único “grupo- aula”, mantendo sempre a distancia social.

 

  • Sinalización: indicarase no chan o sentido de circulación dos usuarios, así como o mobiliario do que se pode facer uso. Non se poderá coller libros dos estantes; haberá que dirixirse ao mostrador da biblioteca ou levantar a man e solicitarllo á persoa responsable nese momento.

 

  • Desinfección: é obrigatorio o uso de máscara e de xel hidroalcólico, tanto á entrada como á saída. A bibliotecaria desinfectará os postos de lectura despois de cada uso (incluída a mesa do profesor).

 

  • Préstamo: farase de forma habitual, aínda que os materiais devoltos deberán permanecer separados, a efectos de prevención, un prazo de 24 horas como mínimo (agás que as autoridades sanitarias, educativas e do ámbito bibliotecario estipulen outros prazos maiores). É dicir, devólvense un día e colócanse ao día seguinte.

 

  • Devolucións: faranse nun carriño colocado na entrada e o/a alumno/a non terá que facer máis nada que depositalo nel. Será ao día seguinte, cando o/a encargado/a da biblioteca terá que rexistrar a devolución e colocalo no estante correspondente.

 

  • Xogos: non se permitirá o uso de xogos que impliquen un uso compartido.



 

 

7 feb. 2020

PREMIO, PREMIO!


XXV certame de Contos e Relatos Curtos Trapero Pardo

Unha ano máis, o CPR Divino Maestro estivo presente na entrega de premios dun dos certames literarios xuvenís máis importantes da provincia e que, no noso caso, estivo organizado e impulsado polo Equipo de Biblioteca. Desta volta foi Samuel Viño (2°ESO) quen acadou o segundo premio na categoría de 12 a 14 anos, valorado en 100 euros. 

Parabéns!!!!


La imagen puede contener: una persona, texto

3 feb. 2020

REAPROPIÁMONOS DO ESPAZ0



A medida que avanza a reforma da Biblio podemos ir re-ocupando os lugares que nos son propios. Aquí vemos as mozas e mozos do cLube de lectura de 3° e 4° da ESO na primeira xuntanza tras a pintura e o cambio de chan, estreando mesas e cadeiras. Seguimos. 



21 ene. 2020

ABERTO POR REFORMAS

Resultado de imaxes para dibujo obrero trabajando
Como é de dominio público, e grazas aos fondos achegados polo PLAMBE, estamos remodelando a Biblioteca. Xa colocaron o novo chan e están a rematar a pintura. Por este motivo, e moi brevemente, a Biblioteca non está todo o operativa que adoita estar. Moi logo volveremos á normalidade, pero mentres tanto se precisades algún libro ou calquera outro documento da Biblio, non dubidedes en contactar con calquera profe membro do Equipo, que de seguro poderá facer algo ao respecto. 
Axiña recuperamos a normalidade!

21 dic. 2019

ESTAMOS EN OBRAS


Grazas á integración do noso cole no PLAMBE, Plan de Mellora das Bibliotecas Escolares, dependente da Consellería de Educación, estamos en obras. Estamos baleirando a Biblioteca para levar a cabo unha remodelación integral. E como o facemos? Coa axuda inestimable e impagable das mozas e mozos de 4º da ESO que, voluntariamente, quixeron participar e botarnos un cable aos profes. 

Traballando unidos, que é o que non podemos acadar?

Infinitas grazas aos nosos mozos e mozas de 4º da ESO




15 dic. 2019

PIRATAS NO DIVINO MAESTRO

Un grupo de dez mozas piratas de 1º e 2º da ESO percorreron o pasado xoves o noso colexio á procura dun saboroso e doce tesouro. En efecto, ataviadas con vistosos panos de cores as mozas lectoras do Club de Lectura  -Ítaca, para máis señas- culminaron o achegamento á obra "A illa do Tesouro" cun emocionante xogo de pistas que as levou por todo o centro, desde Infantil até o laboratorio, pasando pola conserxería, a dirección... Nervios desbordados, risas, tensión... Moita diversión.
Grazas a todas as participantes, ás profes colaboradoras, ás relixiosas que nos axudaron a organizalo todo... A partir de xaneiro máis e mellor!


8 dic. 2019

MOCHILAS VIAXEIRAS

Desde a semana pasada xa andan a rular polas casas do noso alumnado de 3º e 4º de Primaria as MOCHILAS VIAXEIRAS. Como se sabe, trátase dunha iniciativa do Equipo de Biblioteca que busca achegar os materiais dos que dispoñemos na Biblioteca ao alumnado e as súas familias. Asemade, tamén se trata de acadar a complicidade de pais e nais no labor de achegamento á lectura, o audiovisual, á cultura.
En breve, as nenas e nenos de 3º e 4º irannos contando da súa experiencia.
Que o pasen ben!