AÍ VÉN O MAIO DAS LETRAS!

Imos achegándonos a maio e bolen as actividades e os concursos arredor das letras e a lingua que nos son propias. Tamén, como non, temos o certames que no noso cole convoca o Equipo de Dinamización da Lingua para homenaxear a Vidal Bolaño. Imos aló cos de PRIMARIA:

CERTAMES LETRAS GALEGAS 2013

1º CICLO DE EP: concurso de debuxo

·        Os debuxos presentaranse nun folio A-4

·        O tema será: Vivir en Galicia

·        O prazo de presentación remata o 3 de maio

·        Os traballos asinaranse cun seudónimo e acompañados dun sobre co seudónimo escrito fora; dentro deben introducir un papel co nome e apelidos, así como o curso do alumno.

·        Estableceranse dous premios por categoría

·        A entrega de premios farase o día 16 de maio durante a celebración do festival das Letras Galegas

2º CICLO DE EP: concurso de debuxo con lema

·        Os traballos presentaranse no plantel ofrecido polo ENDL

·        O tema versará sobre a potenciación do uso do galego

·        O prazo de presentación remata o 3 de maio

·        Os traballos asinaranse cun seudónimo e acompañados dun sobre co seudónimo escrito fóra; dentro deben introducir un papel co nome e apelidos, así como o curso do alumno.

·        Estableceranse dous premios por categoría

·        A entrega de premios farase o día 16 de maio durante a celebración do festival das Letras Galegas

3º CICLO DE EP: concurso de narración

·        Os traballos terán unha extensión máxima dun folio A-4 polas dúas caras

·        O tema será: Galicia

·        O prazo de presentación remata o 3 de maio

·        Os traballos asinaranse cun seudónimo e acompañados dun sobre co seudónimo escrito fóra; dentro deben introducir un papel co nome e apelidos, así como o curso do alumno.

·        Estableceranse dous premios por categoría

·        A entrega de premios farase o día 16 de maio durante a celebración do festival das Letras Galegas

 ÁNIMO E A TRABALLAR!!!

OS CATRO DA FAMA

Estes catro que aquí locen, Vito, Laura, Dánel e Karla, serán os nosos representantes no concurso de redacción de Coca-Cola que celebrará a súa segunda fase o vindeiro día 19 na nosa cidade.

Desde xa, queremos darlles azos renovados e desexarlles a mellor das sortes. Que a inspiración, a imaxinación e a fortuna non lles sexan esquivas.

O esforzo dámolo por descontado.

ÁNIMO!!!

Talento -abofé- non lles falta.

POIS CLARO QUE TEMOS RAZÓN!!!

Nós pensamos que na educación non hai atallos... parécenos que aprender non é improvisar... cremos que sen lectura non se madura!

E seica temos razón. Que si, que o din os científicos, que son os que saben: o Ministerio de Educación, a través do Instituto de Evaluación Educativa vén de difundir unha investigación da Asociación para a Avaliación dos logros académicos na que, coma sempre, os resultados españois quedan por debaixo da media da UE en mates, ciencias e... LECTURA!

Pois ben, entre as conclusións que o grupo de investigación tira do estudo, lemos:

- As nenas e nenos de familias que incentivan o interese pola lectura conseguen mellores resultados, aínda cando sexan familias en contornos desfavorecidos.

   - Existe un impacto positivo e significativo das actividades de lectura que pode provocar que o alumno mellore os seus resultados, chegando incluso a pasar de estar moi rezagado e con grande probabilidade de repetir a situarse na media da clase.

   - A formación en lingua e os hábitos de lectura do estudante son dúas variables con gran incidencia nos resultados, particularmente relevantes nas familias con menor nivel educativo...

E non o dicimos nós, desde a Biblioteca, que nos vén de oficio, dío xente de fóra. Parece que estiveran pensando no Divino Maestro cando tiraron as súas conclusións!

Obviamente, ler non é receita máxica que todo o cure. Hai que estudar, hai que esforzarse, hai que pensar... pero coa lectura todo é moito máis doado!

DOCES PALABRAS DE CARAMELO

Hoxe tivemos unha xornada moi especial na Biblioteca do Centro: o último dos cinco encontros cun escritor programados para este ano. E resultou unha xornada memorable.

Doces Palabras de Caramelo as que nos trouxo Gonzalo Moure Trenor coa súa voz de veludo, chea de matices, fonda e antiga, directa ao corazón, con aroma de verdade e honestidade.

O alumnado de 5º de Primaria, acompañado dos Piratas polo Miño de 1º da ESO, disfrutaron durante case hora e media da presenza e da palabra deste auténtico cidadán do mundo. Gustou moito a lectura da obra, si, e non decepcionou a manchea de historias, de anécdotas, de sucedidos que hoxe nos foi debullando este home nado en Valencia, residente en Asturias, falante de galego, de hassaní, de español... e capaz de facerse entender só co movemento das súas mans.

E díxonos cousas verdadeiramente importantes este home sabio:

"a literatura é máis profunda cá vida"...  "facede que cada día sexa un día máis, enchédeo de contido, que nunca sexa un día menos"... "os nenos do Sáhara son máis felices ca nós e non teñen nada de todo canto temos nós"... "só escribo o que me conmove"... "igual ca vós, só busco ser feliz"... "non quero transmitir ningunha mensaxe, só quero contar as miñas historias"... "escribide"...

e dicindo cousas así de serias, profundas, interesantes, cousas que tanto dan que pensar, tívonos así de atentos:

Ao rematar, e despois da correspondente sinatura de libros, fixemos unha foto con Gonzalo para lembrar este día que para tantos de nós ficará prendido na memoria.

CERTAME LITERARIO (OUTRO)

Achégase maio, mes das letras, e coa caloriña

-agardamos- veñen numerosas convocatorias de certames e concursos de redacción.

Falamos agora da convocatoria anual da

Biblioteca Nodal polas Letras Galegas 2013.

Poden participar os socios da Biblioteca Pública (a de Ramón Ferreiro, vaia) co tema A TODA MÁQUINA.

Poden presentarse narracións (unha cara dun folio)

ou debuxos (cartolina DIN A4) co mesmo tema nos dous casos.

Tres categorías: ata 8 anos, de 9 a 11 e de 12 a 16

Prazo: Ata o 9 de maio.

Hai dúas convocatorias: a local e a provincial.

Veña eses artistas divinos a traballar!

CERTAME LITERARIO

IV CERTAME DE LITERATURA XUVENIL

"ENTRE IGUAIS"

Convoca o Concello de Lugo: dúas categorías (12-14 e 15-18), tema libre relacionado coa igualdade entre homes e mulleres; o prazo remata o 22 de maio. Botádelle unha ollada ao slideshare para ler as bases íntegras.

Pensádeo e a afiar os lapis.

Ou a prender os ordenadores, vaia.

FINA CASALDERREY NA NOSA BIBLIOTECA

Onte, 2 de abril, Día Internacional do Libro Infantil e Xuvenil, a nosa Biblioteca tivo a inmensa honra e o pracer de acoller a presenza e a palabra da mestra e escritora Fina Casalderrey, Premio Nacional de Literatura Xuvenil e académica da Lingua Galega.

Coidamos que non esaxeramos se dicimos que Fina nos engaiolou a todos os que alí estivemos coa súa palabra, coa súa cercanía: durante hora e media as mozas e os mozos de 6º de Primaria -ademais de algúns de 3º da ESO- escoitaron atentisimamente á autora de O misterio do Faro Vello falando da súa obra, do oficio de escritora, da vida de mestra, relatando pequenas historias que fan a Historia, deixándonos anaquiños de vida para axudarnos a ir facendo as nosas ...

Tamén houbo preguntas, comentarios, interacción, sinatura de libros... moras con azucre para ir saboreando aos poucos, palabras que saían do seu corazón buscando os nosos: sabedoría, experiencia, savoir faire, amor polo oficio de ensinante, paixón pola palabra escrita, foi o que nos transmitíu a de Pontevedra.

Deixounos un gran sabor de boca, a profes e a nenas/os, e agradecemos profundamente á editorial Xerais o galano desta nova visita:

escoitar a Fina fíxonos a todos mellores. Seguro.